Y mae Gwenda Thomas, y Dirprwy Weinidog dros Wasanaethau Cymdeithasol, wedi datgelu fod plant sydd o dan ofal Awdurdodau Lleol yng Nghymru yn mynd i fod ar eu helw yn sgil cynllun Ad-dalu Cronfeydd Ymddiriedolaeth Plant gwell arall o ganlyniad i arian ychwanegol gan Lywodraeth Cynulliad Cymru.

Gyda’r nod o annog awdurdodau lleol i gyfrannu at Gronfeydd Ymddiriedolaeth y plant maen nhw’n gyfrifol amdanyn nhw – mae Llywodraeth y Cynulliad wedi cytuno i ychwanegu at daliadau i awdurdodau lleol o £50 y flwyddyn y plentyn i £100 y flwyddyn y plentyn.

Hefyd, mae Llywodraeth y DU wedi cyflwyno cynllun i ychwanegu at gyfrifon cronfeydd ymddiriedolaeth pob plentyn sydd wedi derbyn gofal yn y DU am flwyddyn neu ragor ers 1 Ebrill 2007 £100 y flwyddyn y plentyn. Mae Llywodraeth y Cynulliad wedi cytuno i weinyddu’r cynllun yng Nghymru a bydd yn derbyn y cyllid angenrheidiol gan Lywodraeth y DU.

Caiff cynlluniau Cymru a’r DU eu cyfuno ac, o ganlyniad, caiff Awdurdodau Lleol yng Nghymru eu had-dalu i roi taliad ychwanegol blynyddol o £200 i blant sydd wedi derbyn gofal am flwyddyn neu ragor ers 1 Ebrill 2007 – o’i gymharu â £100 yng ngweddill y DU.

Yn ôl yr amcangyfrif, o dan y meini prawf cymhwysedd diwygiedig, bydd 500 o blant yn elwa ar y cynllun yn 2008/09, gan godi i 640 yn 2009/10 a 770 yn 2010/11 ar gost o £50,000, £64,000 a £77,000 i Lywodraeth y Cynulliad. Bydd cyfraniad Llywodraeth y DU yn adlewyrchu cyfraniad Llywodraeth Cynulliad Cymru.