Y mae’r Gweinidog dros yr Economi a Thrafnidiaeth, Ieuan Wyn Jones, wedi rhoi cynlluniau gerbron i wella cludiant ysgol yng Nghymru.

Fe osodwyd y Mesur Teithio gan Ddysgwyr (Cymru) gerbron y Cynulliad ar y 15fed o Ebrill.

Fe fydd y deddfau newydd yn darparu fframwaith i wella diogelwch drwy fynd i’r afael ag ymddygiad annerbyniol, ac fe ofynnir i awdurdodau lleol ystyried defnyddio camerâu teledu cylch cyfyng a hebryngyddion ar fysiau ysgol.

Fe fydd y Mesur hefyd yn gwneud cludiant ysgol yn rhad ac am ddim i blant ysgolion cynradd sy’n byw ddwy filltir neu ymhellach o’r ysgol agosaf. Ar hyn o bryd, y ddeddf yw tair milltir o wyth mlwydd oed.

Fe ganiateir i awdurdodau lleol newid amseroedd dechrau ysgolion er mwyn gwneud trefniadau cludiant yn fwy effeithiol, effeithlon neu’n amgylcheddol sefydlog.

Fe ddywedodd y Gweinidog ei fod yn amcanu at gael y prif ddarpariaethau yn eu lle ar gyfer dechrau’r flwyddyn academaidd yn 2009.  Fe ddywedodd hefyd mai’i fwriad yw ceisio â chael rhagor o bŵer deddfwriaethol i’r Cynulliad Cenedlaethol gymryd rhagor o gamau ynglŷn â rheoleiddio bysiau a materion diogelwch.

Fe ellir lawrlwytho’r Mesur arfaethedig oddi ar wefan Cynulliad Cenedlaethol Cymru.

Fe gyhoeddwyd y Mesur drafft ar gyfer ymgynghori ym mis Mehefin 2007, ac fe graffwyd arno gan Bwyllgor Menter a Dysgu y Cynulliad Cenedlaethol, a gyhoeddodd adroddiad ym mis Tachwedd, 2007.