Y mae carfan o Aelodau Seneddol Llafur wedi galw ar i Lywodraeth Cynulliad Cymru wneud addysg rhyw yn rhan orfodol o’r cwricwlwm ym mhob ysgol.

Y mae gan Gymru gyfradd beichiogrwydd uwch ymysg genethod yn eu harddegau na Lloegr, gyda 44.8 yn beichiogi am bob 1,000 o enethod yn 2006, o gymharu â 40.4 yn Lloegr.

Fe lofnodwyd y llythyr at y Western Mail gan Chris Bryant (Y Rhondda), Julie Morgan (Gogledd Caerdydd), Madeleine Moon (Pen-y-bont ar Ogwr), Jessica Morden (Dwyrain Casnewydd) a Martyn Jones (De Clwyd), yn ogystal ag Ymddiriedolaeth Terrence Higgins, Cymdeithas Cynllunio Teulu, y Grŵp Cynghori Annibynnol ar Feichiogrwydd ymysg Genethod yn eu Harddegau, a’r Senedd Ieuenctid Genedlaethol.

Gan fwrw sylw ar y llythyr, fe ddywedodd Catriona Williams, prif weithredwr Plant yng Nghymru: "Yn amlwg, y mae arnom angen holl ystod o wasanaethau ar gyfer pobl ifanc, y maent yn fodlon eu defnyddio.

"Yn ogystal ag addysg rhyw, y mae arnynt angen gwasanaethau ymarferol sy’n hygyrch iddynt, fel eu bod, os ydynt eisiau siarad yn gyfrinachol â rhywun, yn gallu gwneud.  Y mae rhai gwledydd Ewropeaidd yn cynnig gwasanaethau sydd wedi’u cysylltu â’r ysgol, ond nad ydynt mewn gwirionedd yn yr ysgol, sy’n cynnig y cyfrinachedd hynny.

"Y mae arnom angen llawer mwy o drafodaeth gyda phobl ifanc i weld pa wasanaethau y byddent yn eu defnyddio.

"Y mae arnom angen bod yn ofalus peidio â gor-symleiddio’r rhesymau am y gyfradd beichiogrwydd uwch.  Yn amlwg, y mae addysg rhyw dda yn un o ystod o fesurau ataliol ond y mae yna hefyd agweddau mawrion eraill, megis sut y mae pobl ifanc yn gweld eu dyfodol, y mae’n rhaid rhoi sylw iddynt."