Fe lansiwyd strategaeth y Cynulliad i leihau tlodi ymysg plant, sef Dyfodol Teg i'n Plant, ar yr 8fed o Chwefror, 2005. Y mae'r strategaeth yn amlinellu sut y bydd Llywodraeth Cynulliad Cymru yn gweithio i sicrhau bod targedau Llywodraeth y Deyrnas Gyfunol sy'n ymwneud â thlodi ymysg plant yn cael eu cyrraedd. Y mae'r strategaeth yn amlinellu sut y gellir haneru tlodi ymysg plant yng Nghymru erbyn 2010 a'i ddileu'n llwyr erbyn 2020.

Y mae'r strategaeth yn ymdrin â thair prif elfen ar gyfer mynd i'r afael â thlodi ymysg plant. Sef:

• Tlodi o ran Incwm - sy'n ystyried cyfle am waith cyflogedig. Y mae'n ystyried gwaith Cynllun Gofodol Cymru sydd â'r nod o sicrhau bod y swyddi hyn yn cael eu creu yn y rhan o'r wlad ble y mae'u hangen fwyaf. Y mae hefyd yn ystyried cynhwysiad ariannol, trethi, budd-daliadau a grantiau ar gyfer addysg.


• Tlodi o ran Cyfranogi - y mae hyn yn golygu gwaith i sicrhau nad yw plant difreintiedig yn cael eu hepgor o weithgareddau cymdeithasol a hamdden. Y mae hefyd yn golygu gwaith yn erbyn camwahaniaethu a bwlio, a sicrhau bod lleisiau pobl ifanc ddifreintiedig yn cael eu clywed.


• Tlodi o ran Gwasanaethau - y mae hyn yn golygu gwaith i sicrhau bod pob rhan o gymdeithas yn cael cyfle cyfartal i ddefnyddio gwasanaethau cyhoeddus.

Cyrchwch y ddogfen hon oddi ar wefan y Cynulliad.

Fe gynhaliwyd dadl ynglyn ag Ymateb Llywodraeth Cynulliad Cymru i Adroddiad y Grwp Gorchwyl Tlodi Plant yn y Sesiwn Cyflawn ar y 9fed o Chwefror, 2005. Fe ellir cael golwg ar y ddadl yng Nghofnod Trafodion y Sesiwn Cyflawn

Fe ellir gweld sylwadau a wnaed gan Rwydwaith Dileu Tlodi Plant Cymru parthed Dyfodol Teg i Blant yn eu datganiad i'r wasg sydd ar wefan Plant yng Nghymru."