Y mae Sefydliad y Teulu a Magu Plant wedi cyhoeddi adroddiad sy’n dangos bod traean o rieni’n cael nosweithiau di-gwsg oherwydd eu bod yn gofidio am arian, a bod 29% yn ffraeo ynglŷn â chyllidau’u teulu.

Y mae’r adroddiad wedi’i seilio ar arolwg gan YouGov, a holodd 5,309 o rieni plant o dan 16 mlwydd oed ledled y Deyrnas Unedig. Fe ganfu’r arolwg hefyd:

• dywedodd un o bob pedwar o rieni nad yw incwm eu cartref yn ddigon i dalu’r biliau bob mis;  
• dywedodd 27% o rieni’u bod yn credu na fyddant yn gallu talu’r biliau ymhen chwe mis;
• y mae un o bob deg o rieni yn ofni y bydd y prif enillydd cyflog yn cael ei wneud yn ddi-waith yn ystod y chwe mis nesaf;
• y mae gan dri chwarter mamau a thadau ddyledion ar ffurf cardiau credyd, benthyciadau a gorddrafftiau – a’r ddyled gyfartalog yw £8,400;
• y costau sy’n peri’r pryder mwyaf i rieni yw gwresogi, talu’r rhent neu’r morgais, a bwyd (47%, 36% ac 31%, yn ôl eu trefn).

Fe ellir lawrlwytho’r adroddiad oddi ar wefan Sefydliad y Teulu a Magu Plant.