Fe wnaeth y Pwyllgor, sy’n craffu ar y Mesur Arfaethedig ynglŷn â Bwyta’n Iach mewn Ysgolion, gyhoeddi’i adroddiad ddydd Llun, y 6ed o Hydref. Y mae’r adroddiad yn datgan bod angen deddfwriaeth ynglŷn â bwyta’n iach mewn ysgolion, ac y mae’n gwneud yn eglur y dylid symud y ddeddfwriaeth ymlaen yn ddi-oed. Y mae’r Mesur yn Fesur Aelod, a gynigiwyd gan Jenny Randerson, AC. Fe fydd yn cyflwyno safonau maeth newydd ar gyfer prydau bwyd ysgol, yn seiliedig ar arferion gorau ac ymchwil.
Fe fydd yn gosod dyletswydd ar ysgolion ac awdurdodau addysg lleol i hyrwyddo bwyta’n iach yn gyffredinol, ac fe fyddai ganddo oblygiadau ar gyfer y cwricwlwm. Fe fyddai’r Mesur nid yn unig yn rheoleiddio ciniawau ysgol, ond fe fydd hefyd yn edrych ar y diodydd a ddarperir mewn ysgolion, ac ar yr hyn a ddarperir mewn siopau byrbrydau a pheiriannau gwerthu byrbrydau. Fe ganfu’r Pwyllgor fod y mwyafrif llethol o’r sawl a roes dystiolaeth wedi cydnabod y rhan bwysig sydd gan ysgolion mewn annog bwyta’n iach.
Y mae mwy o wybodaeth ar gael yn natganiad y Pwyllgor i’r wasg, ac fe ellir lawrlwytho’r adroddiad oddi ar wefan Cynulliad Cenedlaethol Cymru.