Mae Pwyllgor Menter a Dysgu Cynulliad Cenedlaethol Cymru wedi cyhoeddi adroddiad gydag argymhellion ynglyn â’r ffordd orau i roi cymorth i bobl â dyslecsia yng Nghymru.

Mae’r adroddiad yn nodi nad oes diffiniad safonol ar gyfer dyslecsia y gall Llywodraeth Cynulliad Cymru nac unrhyw awdurdod lleol yng Nghymru gytuno arno. Fel canlyniad, nid oes cysondeb ledled Cymru o ran sgrinio, asesu a darparu gwasanaethau ar gyfer dyslecsia a gaiff eu hariannu gan awdurdodau lleol.

Yn ogystal, mae’r adroddiad yn argymell bod Llywodraeth Cynulliad Cymru, Cyngor Cyllido Addysg Uwch Cymru a’r sefydliadau unigol yn ailasesu cynnwys cyrsiau Hyfforddiant Cychwynnol i Athrawon er mwyn gwella dealltwriaeth athrawon dan hyfforddiant o anghenion dysgu ychwanegol yn sylweddol.

Fe ellir lawrlwytho’r adroddiad oddi ar wefan Cynulliad Cenedlaethol Cymru.