Mae Brian Gibbons, Y Gweinidog dros Gyfiawnder Cymdeithasol a Llywodraeth Leol, wedi cyhoeddi datganiad ysgrifenedig ar gynigion am flaenoriaethau ar gyfer Cynllun Cydraddoldeb Sengl Llywodraeth Cynulliad Cymru.

Mae Llywodraeth Cynulliad Cymru wedi bod yn ymgynghori ar ei Gynllun Cydraddoldeb Sengl Ddrafft yn ddiweddar.

Yn ôl y Gwenidog, y sylwadau allweddol sydd wedi dod allan o’r ymgynghoriad yw’r canlynol:

• "Dylai cydraddoldeb fod yn bwysig i bawb. Busnes pawb yw cydraddoldeb. Rhaid i ni ddylunio mwy o wasanaethau o amgylch ein dinasyddion, ac mae hyn yn galw am ddealltwriaeth wirioneddol o’u hanghenion a’u dymuniadau. Mae ein cymdeithas yn cynnwys dinasyddion a chymunedau amrywiol, er enghraifft, pobl ifanc, mamau sengl, pobl drawsrywiol a lleiafrifoedd ethnig. Nid oes unigolyn nodweddiadol.
• Pan fyddwn yn dweud bod cydraddoldeb yn bwysig i bawb, mae hyn yn cynnwys hawliau grwpiau difreintiedig a grwpiau lleiafrifol i fyw eu bywydau fel dinasyddion llawn, cydradd, gydag urddas a heb ofni gwahaniaethu na rhagfarn.
• Rhaid i ni feddwl am gydraddoldeb a materion hawliau dynol yn gyson ar ddechrau’r broses o lunio polisïau, a hynny i sicrhau ein bod yn gwneud y penderfyniadau gorau posibl ynglŷn â pholisïau ac yn rhoi cydraddoldeb wrth galon busnes.
• Rhaid i ni barhau i ganolbwyntio ar anghenion ein dinasyddion, gan gydnabod amrywiaeth poblogaeth Cymru er mwyn datblygu polisïau, gwasanaethau a strategaethau a ddylunnir i fodloni anghenion y bobl sydd angen y gwasanaethau hynny.
• Rhaid i ni barhau i ddatblygu cysylltiadau cryf rhwng Llywodraeth Cynulliad Cymru, cyrff cyhoeddus, y sector preifat a’r trydydd sector, gan gydweithredu i gyflawni canlyniadau ar y cyd. Rydym yn ymwybodol nad oes modd i ni ddefnyddio dull un-dimensiwn i ymdrin ag anghydraddoldeb cyson."

Fe ellir lawrlwytho’r datganiad oddi ar wefan Llywodraeth Cynulliad Cymru.