Fe gafodd adroddiad sy'n amlinellu cyfeiriad strategol hirdymor ac argymhellion ar gyfer rhagor o weithredu ynglyn â goresgyn tlodi ymysg plant yng Nghymru ei lansio'n swyddogol ar y 9fed o Fehefin, 2004 gan y Gweinidog dros Blant, Jane Hutt. Y mae'r adroddiad ar gael ar gyfer ymgynghori tan y 1af o Fedi, 2004 ac fe fydd canlyniadau'r ymgynghoriad yn dylanwadu ar y strategaeth derfynol.

Hyd y cyfnod ymgynghori: 9/6/04 - 1/9/04

Fe baratowyd yr adroddiad gan y Tasglu Tlodi Ymysg Plant, a gadeiriwyd gan Charlotte Williams, darlithydd mewn Polisi Cymdeithasol ym Mhrifysgol Cymru, Bangor. Fe'i sefydlwyd gan Lywodraeth Cynulliad Cymru i roi sail i'w gwaith o ddatblygu strategaeth i oresgyn tlodi ymysg plant yng Nghymru.

Y mae'r adroddiad yn cyflwyno cyfres o egwyddorion y mae'r Tasglu yn eu cynnig fel y sail ar gyfer y strategaeth. Y mae'n darparu mesuriad y cytunwyd arno ar gyfer mesur tlodi ymysg plant ac y mae'n nodi rhychwant o ddangosyddion a ddefnyddir i fesur perfformiad o ran goresgyn y tlodi. Y mae'n amlinellu'r materion allweddol a ddylai gael sylw fel y'u canfyddir drwy ymgynghori â phlant a phobl ifanc. Y mae'r adroddiad yn nodi materion allweddol i gael sylw wrth fynd ati i oresgyn tlodi ymysg plant yng Nghymru ac y mae'n cynnwys adrannau ar incwm, cyfranogiad a thlodi gwasanaethau. Ym mhob achos, fe ddarperir tystiolaeth i ddangos union arwyddocâd y mater o dan sylw, fe drafodir y polisi presennol ac fe gaiff argymhellion cysylltiedig eu hamlinellu. Y mae'r adroddiad yn pwysleisio nad yw tlodi yn perthyn yn daclus i bortffolios gweinidogol ond fod ganddo oblygiadau ar gyfer pob maes gan gynnwys addysg, y gwasanaethau cymdeithasol, hamdden a thai.

Fe ddywedodd y Gweinidog, Jane Hutt, y byddai Llywodraeth y Cynulliad yn gweithio fel Cabinet i roi ymateb llawn i'r adroddiad.