Diwedd yr ymgynghoriad: 30/01/09

Mae Llywodraeth Cynulliad Cymru yn ymgynghori ar gynllun gweithredu ddrafft i ostwng hunanladdiad a hunan-niweidio.

Mae’r cynllun yn sefydlu nifer o fentrau newydd ac mae’n tynnu at ei gilydd y rhaglenni sy’n bodoli eisoes er mwyn darparu dull strategol o fynd i’r afael ag atal hunanladdiad yng Nghymru.

Dengys ystadegau nad yw bron i dri chwarter o bobl yng Nghymru sy’n cyflawni hunanladdiad yn hysbys i wasanaethau iechyd meddwl yn y flwyddyn cyn eu marwolaeth.

Felly, mae’r prif nodau yn cynnwys codi ymwybyddiaeth o faterion iechyd meddwl ar draws y gymdeithas ehangach ac yn dod o hyd i ffyrdd o helpu’r rhai hynny sydd fwyaf agored i niwed.

Mae’r mentrau newydd yn cynnwys y canlynol:

• cyflwyno rhaglen hyfforddi i weithwyr rheng flaen ledled Cymru fel bod gan staff yn y sectorau sy’n cynnwys iechyd, addysg, canolfannau gwaith, yr heddlu a’r gwasanaeth carchardai y sgiliau sydd eu hangen arnynt i ganfod gofid meddyliol a’u galluogi i ddarparu neu i awgrymu cymorth;
• ymestyn rhaglen hyfforddi arbenigol sy’n cael ei chydnabod yn rhyngwladol ledled Cymru i hyfforddi gofalwyr fel eu bod yn gallu atal unrhyw risg uniongyrchol o hunanladdiad;
• darparu gwasanaeth negeseuon ar hyd a lled Cymru, 24 awr y dydd, saith niwrnod yr wythnos dros y ffôn ac ar ffurf neges testun i bobl sy’n dioddef o broblemau iechyd meddwl;
• sefydlu swydd cydgysylltydd cenedlaethol cyntaf y Samariaid yng Nghymru i reoli gwasanaethau gwirfoddol ar hyd a lled Cymru;
• gweithio gyda rhaglenni sy’n cael eu hariannu gan y loteri i ddarparu mwy o help i grwpiau sy’n anodd eu cyrraedd ac sydd mewn risg fel rhaglenni allgymorth i bobl sy’n cysgu allan ar y stryd a phobl sy’n ddigartref.

Fe ellir lawrlwytho’r cynllun gweithredu oddi ar wefan Llywodraeth Cynulliad Cymru.