Rhwng mis Ebrill a mis Awst, 2003, fe gomisiynwyd Barnardo's ac NCH Cymru gan Lywodraeth Cynulliad Cymru i ymgymryd ag ymgynghoriad cenedlaethol gyda phlant a phobl ifanc anabl i ganfod eu barn am y gwasanaethau y maent yn eu defnyddio, ac argymhellion ar gyfer newidiadau i wasanaethau iechyd, addysg, gofal cymdeithasol a hamdden ledled Cymru. Fe gaiff y canfyddiadau eu defnyddio i hysbysu amcanion Plant yn Gyntaf, y Fframwaith Gwasanaeth Cenedlaethol ar gyfer Plant a datblygiadau ehangach o ran polisi.

Fe ymgynghorwyd â 105 o blant a phobl ifanc o 5 i 25 mlwydd oed drwy amryw o wahanol ddulliau gan gynnwys cyfweliadau, cardiau mynegiant a dulliau gwneud lluniau ac ysgrifennu. Yr oedd y sampl yn cynnwys plant a phobl ifanc gyda rhychwant o wahanol anableddau ac anghenion arbennig.

Fe wnaeth y negeseuon a ganlyn ddeillio o'r broses:

• Agweddau ac ymddygiad staff - O gryn dipyn, dyma a gafodd yr effaith fwyaf ar brofiadau plant a phobl ifanc anabl o ran cael mynediad at wasanaethau ac yr oeddynt yn gosod pwysigrwydd sylweddol ar gael pobl i wrando arnynt, i siarad â hwynt ac i'w trin gyda dealltwriaeth a pharch;


• Darparu gwybodaeth - Yr oedd hi'n amlwg bod yna fylchau o ran dealltwriaeth y plant a'r bobl ifanc o'u hanabledd; gofal a thriniaeth; swyddogaethau a chyfrifoldebau staff; y gwasanaethau y maent yn eu derbyn a'r gwasanaethau sydd ar gael iddynt;


• Mynediad a Chaffaeladwyedd - Y mae yna o hyd sawl her yn wynebu plant a phobl ifanc anabl sydd am gael mynediad at wasanaethau, gyda'r rhwystrau yn rhai o natur corfforol ac o ran agwedd;


• Cyfranogi- Nid yw cyfranogiad plant a phobl ifanc anabl o ran gwneud penderfyniadau am eu gofal a'u triniaeth yn gyson ledled y gwasanaethau.

Y mae'r adrannau 'negeseuon allweddol' drwy'r adroddiad i gyd yn darparu crynodeb llawn o'r prif ganfyddiadau.

Fe ellir llwytho'r adroddiad oddi ar wefan y Cynulliad.