Dydd Mercher, yr 17eg o Hydref, 2007
Y MAE PLANT YNG NGHYMRU YN CROESAWU PWYLLGOR CRAFFU PLANT A PHOBL IFANC
Y mae Plant yng Nghymru yn croesawu bod Pwyllgor Craffu y Cynulliad ar gyfer Plant a Phobl Ifanc wedi’i sefydlu, fel y cytunwyd gan Gynulliad Cenedlaethol Cymru ddoe. Y mae Plant yng Nghymru hefyd yn croesawu aelodau’r Pwyllgor ac y mae’n gobeithio gweithio yn agos gyda hwynt yn y dyfodol.
Fe wnaeth Plant yng Nghymru, y corff cenedlaethol i aelodau, lobïo dros y cyfryw Bwyllgor oherwydd ei fod yn hanfodol bod effeithiau holl bolisïau Llywodraeth y Cynulliad ar blant a phobl ifanc yn cael eu craffu os yw’u bywydau i gael eu gwella. Y mae hyn yn cynnwys polisïau na fyddent fel arfer yn cael eu hystyried fel rhai sy’n uniongyrchol berthnasol i blant o ran pynciau megis cludiant, yr amgylchedd a materion gwledig, yn ogystal â phynciau sy’n fwy uniongyrchol gysylltiedig fel y gwasanaethau cymdeithasol, iechyd ac addysg.
Fe allai’r Pwyllgor hefyd fod yn gyfrifol am ystyried y cynnydd a wnaed ar yr Adroddiadau Blynyddol oddi wrth Gomisiynydd Plant Cymru. Cyn i Ddeddf Llywodraeth Cymru 2006 gael ei gweithredu, yr oedd Comisiynydd Plant Cymru yn atebol i’r Cynulliad yn ei gyfanrwydd. Y mae hi yn awr yn eithriadol o bwysig bod yna Bwyllgor gyda’r cyfrifoldeb hwn.
Yn ystod tymor y Cynulliad blaenorol, yr oedd yna ddiddordeb sylweddol mewn materion plant a phobl ifanc yng ngwahanol bortffolios Gweinidogol Llywodraeth Cynulliad Cymru. Fodd bynnag, un o’r materion oedd y toreth o bolisïau nad oeddynt o angenrheidrwydd wedi’u cydlynu ac y gallent yn achlysurol wrth-ddweud neu danseilio’r naill a’r llall. Fe wnaeth hyn hi’n anodd i’r darparwyr gwasanaethau yn y maes weithredu’r polisïau hyn. Fe ddylai un Pwyllgor sengl yn craffu ar weithgareddau yn ymwneud â phlant a phobl ifanc fod yn effeithiol gyda mynd i’r afael â hyn. Y mae’n neilltuol o amserol yng ngoleuni Deddf Plant 2004 sy’n gosod yn y llyfr statud y gofyniad bod asiantaethau yn gweithio gyda’i gilydd ac yn cyfuno cyllidebau. Y mae hi felly’n hanfodol bod polisïau Llywodraeth y Cynulliad yn adlewyrchu hyn a bod yna graffu gan y Cynulliad.
Fe ddywed Catriona Williams, y Prif Weithredwr:
"Gan ein bod wedi ymgyrchu’n gadarn ers yr etholiadau ac yn ystod yr haf am Bwyllgor Craffu Plant a Phobl Ifanc, yr wyf i ac aelodau Plant yng Nghymru wrth ein boddau y bydd Pwyllgor o’r fath yn awr yn cael ei sefydlu. Y mae’n ddatblygiad aruthrol o arwyddocaol a ddylai fod yn gallu cadw golwg ar y ffordd y gweithredir Confensiwn y Cenhedloedd Unedig ar Hawliau’r Plentyn yng Nghymru. Yn arwyddocaol, y mae, yn fwy na thebyg, yn un o’r Pwyllgorau Seneddol trawsbynciol cyntaf yn Ewrop, pwyllgor a’i unig ddiben yw canolbwyntio ar hawliau plant a phobl ifanc."
Am fwy o wybodaeth, a fyddech cystal â chysylltu â:
Catriona Williams, Prif Weithredwr, neu
Sean O’Neill, Cyfarwyddwr Polisi
Plant yng Nghymru, 25 Plas Winsor, Caerdydd CF10 3BZ.
Ffôn: 029 2034 2434
Ffacs: 029 2034 3134
E-bost: caroline.taylor@childreninwales.org.uk neu catriona.Williams@childreninwales.org.uk neu mailto:sean.oneill@childreninwales.org.uk
Gwefan: www.childreninwales.org.uk
Nodiadau:
NDM3694 Dafydd Elis-Thomas (Dwyfor Meirionnydd)I gynnig bod Cynulliad Cenedlaethol Cymru, yn unol â Rheol Sefydlog 21, yn sefydlu Pwyllgor Plant a Phobl Ifanc. Fe fydd y Pwyllgor yn bodoli am hyd y Cynulliad hwn.
Fe gytunwyd ar y Cynnig, yn unol â Rheol Sefydlog 7.35.
……………………………
NDM3695 Dafydd Elis-Thomas (Dwyfor Meirionnydd)
I gynnig bod Cynulliad Cenedlaethol Cymru, yn unol â Rheol Sefydlog 10.3, yn ethol Lynne Neagle (Llafur), Christine Chapman (Llafur), Helen Mary Jones (Plaid Cymru); Angela Burns (Ceidwadwyr) ac Eleanor Burnham (Democratiaid Rhyddfrydol) yn aelodau’r Pwyllgor Plant a Phobl Ifanc.
1. Cefndir i CHILDREN IN WALES - PLANT YNG NGHYMRU
Fe sefydlwyd Plant yng Nghymru ym mis Mawrth 1992 ac fe ddaeth yn elusen gofrestredig yn 1993. Ei nod yw hyrwyddo buddiannau plant, gwella gwasanaethau yng Nghymru a rhoi plant yn uchel ar yr agenda Gymreig. Yr ydym yn gweithio’n agos gyda’n haelodau, sy’n cynnwys gweithwyr proffesiynol, llunwyr polisi a grwpiau defnyddwyr, i wella bywydau’r holl blant sy’n byw yng Nghymru, ond yn enwedig plant ieuainc, y sawl yr effeithir arnynt gan ansefydlogrwydd teuluol, plant y mae arnynt anghenion arbennig neu anableddau a’r sawl sy’n dioddef effeithiau tlodi ac amddifadedd. Yr ydym yn casglu a lledaenu gwybodaeth am blant a hyrwyddo arferion da mewn gwasanaethau plant drwy ymchwil, datblygiad polisi ac arferion, cyhoeddiadau, cynadleddau, seminarau, hyfforddiant a mynediad at wasanaeth llyfrgell a gwybodaeth helaeth. Y mae gan Plant yng Nghymru swyddfeydd yng Nghaerdydd a Chaernarfon.
Y mae Plant yng Nghymru yn gweithio mewn partneriaeth â Biwro Cenedlaethol y Plant a Plant yn yr Alban ac y mae’n aelod gweithredol o EUROCHILD (corff y mae Catriona Williams yn Llywydd arno) a hefyd y Fforwm Rhyngwladol er Lles Plant.
2. Y Pwyllgor
Fe fydd y pwyllgor yn Bwyllgor Craffu o eiddo Cynulliad Cenedlaethol Cymru. Y mae gan y pwyllgorau hyn y pŵer i archwilio gwariant, gweinyddiaeth a pholisi Llywodraeth y Cynulliad a chyrff cyhoeddus cysylltiedig. Y mae gan Gynulliad Cenedlaethol Cymru bedwar pwyllgor craffu arall, sef y Pwyllgor Cymunedau a Diwylliant, y Pwyllgor Menter a Dysgu, y Pwyllgor Iechyd, Lles a Llywodraeth Leol, a’r Pwyllgor Cynaliadwyedd.