Datganiad i’r Wasg
Fe fydd teuluoedd o bob cwr o Gymru ymysg miloedd fydd yn gorymdeithio drwy Lundain y penwythnos hwn, yn galw ar Lywodraeth y Deyrnas Unedig i gadw’i haddewid ynglŷn â dileu tlodi ymysg plant. Fe addawodd Llywodraeth y Deyrnas Unedig haneru tlodi ymysg plant erbyn 2010 ond y maent mewn gwir berygl o fethu â chyrraedd y targed hwn. Yn yr hinsawdd economaidd gyfredol, y mae’n neilltuol o bwysig bod y Llywodraeth yn gweithredu’n eofn yn awr i sicrhau gwell dyfodol i’n plant i gyd.
Y mae gan y Deyrnas Unedig un o’r cyfraddau uchaf o dlodi ymysg plant yn Ewrop, er gwaethaf y ffaith mai hi yw’r bumed genedl gyfoethocaf. Yng Nghymru, y mae bywydau 29 y cant o blant yn cael eu difetha gan dlodi.
I ddangos i’r Llywodraeth bod y cyhoedd yn wirioneddol bryderus ynglŷn â thlodi ymysg plant, fe fydd plant, pobl ifanc a theuluoedd yn ymgynnull ym Millbank o 11:30 y bore ar y 4ydd o Hydref, cyn gorymdeithio i Sgwâr Trafalgar. Am 2.00 y pnawn, fe fydd yna funud pan ofynnir i bawb wneud cymaint o sŵn â phosibl i sicrhau bod Stryd Downing yn clywed y neges.
Y mae’r digwyddiad yn cael ei drefnu gan yr Ymgyrch i Ddileu Tlodi ymysg Plant, sef clymblaid o fwy na 120 o elusennau, undebau llafur, grwpiau ffydd a sefydliadau eraill, y mae Plant yng Nghymru’n aelod ohonynt.
Fe ddywed Sean O’Neill, Cyfarwyddwr Polisi dros Plant yng Nghymru: "Ddydd Sadwrn hwn, fe fydd y Deyrnas Unedig yn dyst i’r digwyddiad mwyaf erioed i ddileu tlodi ymysg plant yn y wlad hon a’i fwriad yw anfon neges eglur i Lywodraeth y Deyrnas Unedig na fydd y lefelau cyfredol o dlodi ymysg plant yn cael eu goddef mwyach. Y mae’r rali yn addo bod yn achlysur sy’n addas i’r teulu, ac yr ydym yn edrych ymlaen at weld llawer o blant, pobl ifanc a’u teuluoedd o bob cwr o Gymru’n cymryd rhan. Y mae yna neges ddifrifol, wrth gwrs, ac yr ydym yn ailadrodd ein galwad ar Lywodraeth y Deyrnas Unedig i wario ond £3 biliwn i barhau ar y trywydd iawn ac i gyrraedd y targed o haneru tlodi ymysg plant erbyn 2010."
Y mae Plant yng Nghymru’n cynorthwyo i gydlynu’r gwaith o gynnwys pobl o Gymru yn y rali, ochr yn ochr â’n partneriaid, fel rhan o Rwydwaith Dileu Tlodi Plant Cymru. Y mae bysiau o Gymru’n cael eu trefnu gan Achub y Plant.
Nodiadau:
1. Fe fydd yr orymdaith Cadwch yr Addewid, a drefnwyd gan yr Ymgyrch i Ddileu Tlodi ymysg Plant, yn digwydd ddydd Sadwrn, y 4ydd o Hydref 2008 yn Llundain.
2. Plant yng Nghymru yw’r sefydliad ymbarél cenedlaethol ar gyfer sefydliadau gwirfoddol, statudol a phroffesiynol ac unigolion sy’n gweithio gyda phlant a phobl ifanc yng Nghymru. www.childreninwales.org.uk
3. Y mae Plant yng Nghymru’n cydlynu Rhwydwaith Dileu Tlodi Plant Cymru, clymblaid o gonsyrn sy’n canolbwyntio ar ddileu tlodi ymysg plant yng Nghymru. www.endchildpovertycymru.org.uk
4. Am ragor o wybodaeth parthed y datganiad hwn i’r wasg, cysylltwch â Sean O’Neill: Plant yng Nghymru, 25 Plas Winsor, Caerdydd, Ffôn: 029 2034 2434, Ffôn Symudol: 07887 947207 , E-bost: sean.oneill@childreninwales.org.uk