A A English | Cymraeg

Bwrdd Ymddiriedolwyr

Fe reolir Plant yng Nghymru gan Fwrdd Ymddiriedolwyr o hyd at 12 o aelodau. Y mae Bwrdd yr Ymddiriedolwyr yn ymdrin â chyllid a threfn lywodraethol y sefydliad. Mae’r aelodau yn gwasanaethu am ddau dymor o dair blynedd ar y mwyaf, a chânt eu hethol yn flynyddol yn y Cyfarfod Cyffredinol Blynyddol.

Dr David Williams

Cadeirydd

Wedi fy ngeni a’m magu yng Nghaerdydd, mynychais Ysgol Feddygol Prifysgol Southampton, yna hyfforddi mewn Seiciatreg Plant yn Ne Cymru. Fe’m penodwyd yn Ymgynghorydd mewn Seiciatreg Plant ar gyfer Cwm Rhymni ym 1998, gan ddod yn Gyfarwyddwr Clinigol CAMHS ar gyfer Gwent yn 2001.

Ar hyd o bryd, rwy’n Gyfarwyddwr Rhanbarthol Teuluoedd a Therapïau yng Ngwent. Mae hyn yn ymgorffori holl wasanaethau plant cymunedol a chleifion preswyl. Mae fy ngwaith clinigol gyda thîm iechyd meddwl arbenigol Gwent i blant gydag anableddau dysgu a phlant yn y system cyfiawnder ieuenctid.

Fe wnes i gwblhau ymchwil ar ddiddyfnu alcohol ac yna arwain prosiect ymchwil wedi’i ariannu: dilyniant 30 mlynedd o oroeswyr trychineb Aberfan.

Roeddwn yn gyfarwyddwr Rhaglen Hyfforddiant ar gyfer seiciatreg plant yng Nghymru (2004-2009) ac ar hyn o bryd yn ymgynghorydd proffesiynol ar Iechyd Meddwl Plant i Lywodraeth Cymru.

Fe ddatblygwyd cysylltiadau gen i gyda gwasanaethau plant, gwasanaethau addysg, gwasanaethau iechyd meddwl oedolion, asiantaethau gofal sylfaenol a gwirfoddol. Yn genedlaethol, fe ddatblygais fforymau er mwyn sicrhau ymwneud a chyfranogiad defnyddwyr gwasanaethau mewn partneriaeth â’r rhai hynny sy’n cyflenwi’r gwasanaethau hyn. Rwyf wedi f’ymrwymo i well cyfathrebu a gwaith aml-asiantaeth er mwyn cyfarfod ag anghenion pobl ifanc, yn enwedig y rhai sy fwyaf dan anfantais.

Oddi allan i ‘ngwaith, rwy’n mwynhau amser gyda ‘nheulu, a chwaraeon (yn gwylio mwy bellach yn anffodus).

Yr Athro Jonathan Scourfield

Mae Jonathan yn Athro Gwaith Cymdeithasol ym Mhrifysgol Caerdydd, ac yn gweithio’n academydd gwaith cymdeithasol ers 1996. Mae llawer o’i ymchwil wedi canolbwyntio ar blentyndod a les plant, gan roi sylw arbennig i blant lleiafrifoedd ethnig ac ymyriadau gyda thadau, yn ogystal â hunan-laddiad a hunan-niwed. Ei lyfrau diweddaraf, sydd wedi eu cyd-ysgrifennu gydag academyddion eraill, yw Muslim Childhood (Gwasg Prifysgol Rhydychen, 2013) ac Understanding Suicide (Palgrave Macmillan, 2011). Hefyd mae ganddo gryn brofiad o ddysgu ar gyrsiau gwaith cymdeithasol a bod yn gyfrifol amdanynt. O’r blaen gweithiodd Jonathan fel athro ysgol gyfun, yn weithiwr grŵp mewn cymuned therapiwtig ac yn swyddog prawf.

Ann Shabbaz

Mae gan Ann Shabbaz wybodaeth eang am weithio yn y sectorau Statudol, Gwirfoddol a Phreifat. Bu gan Ann swyddi uwch ym maes Gwasanaethau Plant ers dros bum mlynedd ar hugain, yn sicrhau bod portffolio cymysg o wasanaethau’n cael eu cyflwyno i Bobl Ifanc, yn enwedig y rhai sy’n rhan o’r system ofal. Mae’r gwasanaethau hyn wedi cynnwys; Diogelu, Maethu a Mabwysiadu, Gwasanaethau Anabledd, Rhai sy’n Gadael Gofal a’r Digartref.

Mae gan Ann hanes o weithio gydag grwpiau sydd ar y cyrion, ac mae ganddi ymdeimlad cryf o gyfiawnder cymdeithasol. Yn strategol mae hi bob amser wedi ceisio cynyddu ymwybyddiaeth o faterion anodd, a cheisio creu partneriaethau sy’n gallu ymdrin â rhai o’r anawsterau a nodwyd, gan sicrhau bod anghenion a safbwyntiau’r rhai yr effeithir arnynt yn ganolog i’r ateb.

Mae Ann yn gallu gweithio ar draws gwahanol grwpiau oedran, ac mae ganddi’r sgiliau a’r wybodaeth i ddod â nhw at ei gilydd, gan arwain cyfarfodydd, gweithgareddau ymchwil, a gwaith datblygu. Mae ganddi brofiad o reoli cyllidebau, ar draws ffiniau sefydliadol a diwylliannol, gan gynnwys Iechyd ac Addysg. Mae wedi cael profiad o weithio ar draws sawl Awdurdod, ac wedi cyflawni swyddi ar lefel Cymru Gyfan.

Ar hyn o bryd hi yw Cyfarwyddwr Gwasanaethau Plant cwmni preifat sy’n cynnig gofal preswyl i Blant a Phobl Ifanc, a hi sy’n gyrru ymdrechion y cwmni i ddatblygu’n Ganolfan Ragoriaeth yng Nghymru ar gyfer cyflwyno’r gwasanaethau hyn. Mae’r cartref wedi cael ei arolygu am y tro cyntaf, ac mae’n bwysig ei fod yn ardderchog ym marn y plant a’u rhieni. Er mai sefydliad newydd ydyw, rydym yn awyddus i archwilio a datblygu partneriaethau newydd o fewn y sector preifat, er mwyn codi safonau ym maes Gofal Preswyl a chydweithio a rhannu swyddogaethau allweddol Hyfforddiant, gan sicrhau Cydraddoldeb ac Amrywiaeth. Mae Ann hefyd yn aelod profiadol o’r system Gwynion Annibynnol i Blant a’u Teuluoedd ar ran Llywodraeth Cymru.

 

Hannah Williams

Mae gan Hannah fwy na 13 mlynedd o brofiad yn y trydydd sector, yn cyflenwi gwasanaethau i blant a theuluoedd agored i niwed. Fel ymarferydd ieuenctid a chymunedol cymwysedig, mae wedi gweithio ledled Cymru ac yn rhyngwladol mewn amrywiaeth o swyddogaethau, gan gynnwys swyddogaethau ymarferydd hyd at swyddi uwch reoli. Mae ei phrofiad yn cynnwys gweithio gyda sefydliadau bychain trwy elusennau cenedlaethol.  Mae Hannah ar hyn o bryd yn gweithio i Hosbis Plant Tŷ Hafan a hefyd yn dal swyddogaeth fel Is-gadeirydd Plant Mewn Angen BBC, Cymru ac fel Ymddiriedolwr i Inroads, y sefydliad lleihau niwed cyffuriau stryd ar gyfer Caerdydd a’r Fro. Mae hi hefyd yn cyflwyno cyrsiau hyfforddi ac achrededig mewn gwaith ieuenctid a chymunedol ar ran Coleg Cymunedol YMCA.  Mae Hannah yn cael ei hysgogi gan gred bersonol sylfaenol mewn ymarfer person-ganolog wedi’i seilio ar gryfderau  ac mae ar hyn o bryd yn ymchwilio i rôl ymarfer person-ganolog wrth ymwneud â theuluoedd fel rhan o’i MA mewn Rheoli Galwedigaethau Cymunedol.

Yr Athro David Egan

David Egan yw Athro Polisi Addysg Gymraeg ym Mhrifysgol Cymru y Drindod Dewi Sant lle mae’n gweithredu fel Cyfarwyddwr Canolfan Cymru er Cydraddoldeb mewn Addysg ac Arweinydd Gweithredol y rhaglen ‘Teach First’.

Yn ystod ei yrfa mae wedi bod yn athro, yn arweinydd ysgol, yn bennaeth ar Adran Addysg Prifysgol, yn Arolygydd Cofrestredig i Estyn, ac yn ymgynghorydd i’r Llywodraeth, gan gynnwys bod yn Ymgynghorydd Arbennig i Brif Weinidog a Chabinet Llywodraeth Cymru rhwng 2005 a 2007.

Mae ei bortffolio gwaith cyfredol yn canolbwyntio’n arbennig ar dorri’r cysylltiad rhwng tlodi a chyflawniad addysgol isel, ac mae wedi cyhoeddi adroddiadau yn y maes hwn gydag Achub y Plant, Sefydliad Bevan a Sefydliad Joseph Rowntree.

Ymhlith y penodiadau cyhoeddus sydd ganddo ar hyn o bryd, mae’n gwasanaethu fel cadeirydd Grŵp Ymgynghorol Arbenigol Llywodraeth Cymru ar Drechu Tlodi, y Bwrdd Partneriaeth Gofal Plant, a Grŵp Arbenigol Llywodraeth Cymru ar y Cyfnod Sylfaen.

Jane Newby

Mae gyrfa broffesiynol Jane wedi ymgorffori nifer o rolau a chyfrifoldebau gan weithio gyda phlant, teuluoedd a grwpiau addysgol. Ar ôl dechrau ei gyrfa yn gweithio gyda grwpiau dan anfantais (NEETS), ailhyfforddodd wedyn fel athrawes ac ers hynny wedi gweithio o fewn nifer o ysgolion yng Nghymru. Fel eiriolwr o blaid ‘anghenion arbennig ac ychwanegol’ mae wedi gweithio gyda phlant ag anawsterau gwybyddol ac iaith gwaelodol.

Mae profiad ychwanegol o weithio ym maes addysg bellach ac uwch wedi caniatáu i Jane ddatblygu a chefnogi myfyrwyr ac ymarferwyr sy’n gweithio’n uniongyrchol gyda phlant a phobl ifanc, datblygu cwricwla ac estyn rhwydweithiau proffesiynol ehangach. O fewn ei rôl bresennol fel Pennaeth Ysgol Cysylltiol mae’n cymryd yr arweinyddiaeth strategol dros feysydd pwnc Blynyddoedd Cynnar ac Astudiaethau Therapiwtig. Mae’n sicrhau bod swyddogaethau academaidd, ansawdd a rheoleiddio yn cael eu cynnal ac yn gyfrifol am gynllunio cyllidebol ac ariannol adran fawr.

Mae gan Jane brofiad helaeth o reoli prosiectau, gan hwyluso ac arwain timau drwy drafod y cysyniad cychwynnol i gynllunio, gweithredu a hwyluso.

Dr Sarah Jones

Mae Sarah yn Ymgynghorydd gyda Iechyd Cyhoeddus Cymru, ac mae’n ganddi ddiddordeb arbennig yn Iechyd Cyhoeddus Plant a Phobl Ifanc. Ar hyn o bryd, mae hi’n arwain yr Adolygiad Marwolaeth Plant, Adolygiad Thematic o Achosion o Foddi, i Gymru. Mae gan Sarah ddiddordeb parhaus mewn atal anafiadau plant, ac mae wedi gweithio gyda Plant yng Nghymru. Roedd ei PhD yn astudiaeth o anafiadau plant sy’n gerddwyr. Mae wedi cyflawni rôl eiriolaeth bwysig dros gyflwyno trwyddedau graddedig i yrwyr, er mwyn gwella problem wirioneddol diogelwch gyrwyr ifanc a’u teithwyr. Mae Sarah hefyd wedi ymwneud â phrosiectau diogelwch plant yn y cartref ac ym myd chwaraeon. Mewn rôl flaenorol, bu Sarah hefyd yn ymwneud â gwaith i leihau nifer yr achosion o feichiogrwydd yn yr arddegau.

Cafodd Sarah ei geni a’i magu yng Nghaerdydd. Mae hi’n treulio ei hamser y tu allan i’r gwaith yn chwerthin gyda’i merch 19 mis oed ac yn ei haddysgu ynghylch ‘llawenydd’ rygbi Cymru.

Sarah Crawley

Penodwyd Sarah i swydd Cyfarwyddwr, Barnardo’s Cymru ym mis Awst 2016 ar ôl gweithio fel Pennaeth Tlodi ac Atal Tlodi, Dinas a Sir Abertawe ers 2013.

 

Addysgwyd Sarah ym Mhrifysgol Loughborough a Phrifysgol Coventry. Mae ganddi gefndir helaeth ym maes gofal cymdeithasol, gwasanaethau ymyrraeth gynnar i deuluoedd a phobl ifanc, adfywio cymunedol, tai ac ailsefydlu troseddwyr, ar ôl gweithio i nifer o awdurdodau lleol yng Nghymru a Lloegr.

 

Dechreuodd gyrfa llywodraeth leol Sarah fel hyfforddai tai ac adfywio i Gyngor Lewisham, cyn symud i Gyngor Dinas Coventry lle bu’n dal nifer o swyddi rheoli yn datblygu gwasanaethau cymdogaethau ar gyfer cymunedau, adsefydlu troseddwyr a gwasanaethau gofal cymdeithasol i oedolion. Symudodd Sarah i Gymru i ymgymryd â rôl unigryw i Gyngor Abertawe yn rhedeg eu holl wasanaethau atal ac ymyrraeth gynnar i blant, pobl ifanc, teuluoedd a chymunedau.

 

Ers dod yn Gyfarwyddwr i Barnardo’s Cymru mae Sarah wedi sefydlu dull mwy cydweithredol, gan ganolbwyntio ar themâu yn strategaeth 10 Mlynedd Barnardos, yn ogystal ag ehangu gwasanaethau ar gyfer plant sydd wedi cael eu heffeithio gan garchariad rhiant a gweithio gyda chyn-filwyr a’u teuluoedd.